Romanoj (Ĉapitro: 12, 2)

Kaj ne konformiĝu al ĉi tiu mondo; sed aliformiĝu per renovigado de via menso, por ke vi provu, kio estas la bona kaj aprobinda kaj perfekta volo de Dio.

Li forviŝos ĉiun larmon

Kaj Li (Dio) forviŝos ĉiun larmon el iliaj okuloj; kaj la morto jam ne ekzistos; ne plu ekzistos funebro, nek plorado, nek doloro; la unuaj aferoj forpasis. (Libro: Apokalipso - Ĉapitro: 21, 4)

Mia Sinjoro min forgesis

Ĉu povas virino forgesi sian infaneton kaj ne kompati la idon de sia ventro? Eĉ se ili forgesos, Mi vin ne forgesos. (Jesaja 49, 15)

ŝtonoj fariĝu panoj

Tiam Jesuo estis kondukita supren de la Spirito en la dezerton, por esti tentata de la diablo. Kaj fastinte kvardek tagojn kaj kvardek noktojn, li poste malsatis. Kaj la tentanto venis, kaj diris al li: Se vi estas Filo de Dio, ordonu, ke tiuj ŝtonoj fariĝu panoj. Sed responde li diris: Estas skribite: Ne per la pano sole vivas homo, sed per ĉiu vorto, kiu eliras el la buŝo de Dio.

Tempo de Advento

Unua DIMANĈO DE ADVENTO
ENIRA ANTIFONO Psa 24 (25), 1-3

Al Vi, Sinjoro, mi levas mian animon.
Mia Dio, Vin mi fidas; mi ne spertu disreviĝon.
Ne moku min miaj malamikoj.
Ĉar neniu el tiuj, kiuj esperas en Vi, hontos.

KOLEKTO

Donu, ni petas, ĉiopova Dio, tian volon al viaj kredantoj,
ke ili, irante renkonte per virtaj faroj al via Kristo venanta,
kaj daŭre kun Li kunigite, meritu posedi la ĉielan regnon.
Per nia Sinjoro Jesuo Kristo, via Filo,
kiu vivas kaj regas kun Vi en unueco kun la Sankta Spirito,
Dio en ĉiuj jarcentoj.

OFERA PREĜO

Sinjoro, nia Dio,
akceptu la oferaĵojn, kiujn ni ricevis de via boneco.
Vi ilin donacis al ni,
por ke ni povu celebri la eŭkaristian oferon.
Faru, ke ĝi estu al ni garantiaĵo por la eterna vivo.
Per Kristo nia Sinjoro.

KOMUNIA ANTIFONO Psa 84 (85), 13

La Sinjoro nin benos kaj la tero donos siajn fruktojn.

POSTKOMUNIA PREĜO

La misteroj, kiujn ni ricevis de Vi, Sinjoro,
ebligu al ni terpilgrimantoj
disigi niajn korojn de tio, kio pasas,
kaj aliĝi al la ĉielo, kiu eterne daŭras.
Per Kristo nia Sinjoro.

2a DIMANĈO DE ADVENTO
ENIRA ANTIFONO kp Jes 30, 19.30

Popolo de Cion, la Sinjoro venos por savi la homojn,
kaj Li aŭdigos al vi sian voĉon
por la ĝojo de via koro.

KOLEKTO

Ĉiopova kaj kompatema Dio,
donu, ke neniu tera afero malhelpu nin
rapidi renkonte al via Filo;
sed la ĉiela saĝeco nin kunigu al Kristo,
kiu vivas kaj regas kun Vi en unueco kun la Sankta Spirito,
Dio en ĉiuj jarcentoj.

OFERA PREĜO

Ĉiopova Dio,
estu al Vi agrablaj niaj humilaj preĝoj kaj oferoj;
kaj, ĉar meritojn validajn antaŭ Vi ni ne posedas,
helpu nin via mizerikorda graco.
Per Kristo nia Sinjoro.

KOMUNIA ANTIFONO Bar 5, 5; 4, 36

Vekiĝu, Jerusalemo, kaj staru:
kontemplu la feliĉon, kiu venas de via Sinjoro.

POSTKOMUNIA PREĜO

Satigitaj de la pano de vivo, humile ni petas Vin, Sinjoro:
per la partopreno en ĉi tiu mistero instruu nin
pritaksi saĝe la terajn aferojn kaj intense ami la ĉielajn.
Per Kristo nia Sinjoro.

3a DIMANĈO DE ADVENTO
ENIRA ANTIFONO kp Flp 4, 4.5

Ĝoju ĉiam, ĉar vi apartenas al la Sinjoro.
Denove mi diras: Ĝoju.
Ĉar la Sinjoro estas proksima.

KOLEKTO

Rigardu, Dio, vian popolon,
kiu kun fido atendas la naskiĝon de la Sinjoro, kaj faru,
ke ni, nin pretigante ricevi tiun grandan misteron de savo,
sopiru celebri ĝin kun intensa ĝojo.
Per nia Sinjoro Jesuo Kristo, via Filo,
kiu vivas kaj regas kun Vi en unueco kun la Sankta Spirito,
Dio en ĉiuj jarcentoj.

OFERA PREĜO

Ni petas, Sinjoro,
ke la oferdono de nia pieco estu ĉiam dediĉata al vi;
kaj ke ĝi, per la potenco de la dia graco,
estigu en ni vian mirindan savon.
Per Kristo nia Sinjoro.

KOMUNIA ANTIFONO Jes 35, 4

Diru al tiuj, kiuj estas deprimitaj en sia koro:
“Estu fortaj, ne timu;
jen venas via Dio:
Li mem venas por vin savi.”

POSTKOMUNIA PREĜO

Ni petas de via boneco, Sinjoro,
ke la helpo de via sakramento preparu nin por la proksimaj festoj,
purigante nin de ĉiu malbono.
Per Kristo nia Sinjoro.

4a DIMANĈO DE ADVENTO
ENIRA ANTIFONO kp Jes 45, 8

Rosu, ĉielo, de supre,
kaj el vi, nuboj, venu la Justulo.
Malfermiĝu la grundo
kaj la Savanto ekĝermu.

KOLEKTO

Ĉiopova Dio, enverŝu, ni petas,
vian gracon en nian animon,
kaj faru ke ni, kiuj per la anĝela anonco
ekkonis la enkarniĝon de Kristo, via Filo,
per lia pasiono kaj kruco
estu ankaŭ gvidataj al la gloro de la reviviĝo.
Per nia Sinjoro Jesuo Kristo, via Filo,
kiu vivas kaj regas kun Vi en unueco kun la Sankta Spirito,
Dio en ĉiuj jarcentoj.

OFERA PREĜO

Ĉi tiuj oferdonoj, prezentitaj sur via altaro, Sinjoro,
estu sanktigataj de via Spirito,
kiu per sia potenco igis fekunda la sinon de la virgulino Maria.
Per Kristo nia Sinjoro.

KOMUNIA ANTIFONO Jes 7, 14

Jen virgulino koncipos kaj naskos filon,
kaj oni donos al Li la nomon Emanuelo.

POSTKOMUNIA PREĜO

Ĉiopova Dio, de kiu ni ricevis la promeson de la eterna savo,
ni Vin petegas:
ju pli alproksimiĝas la granda tago de nia savo,
des pli fervore ni pretiĝu por inde celebri la naskiĝon de via Filo.
Per Kristo nia Sinjoro.

LA SANKTA MESO

RITARO DE LA MESO KUN POPOLO
SIGNOJ: C.- Celebranto L.- Lektoro K.- Kunvenintoj



KOMENCA RITO

C. En la nomo de la Patro kaj de la Filo kaj de la Sankta Spirito.
K. Amen.

C. La graco de nia Sinjoro Jesuo Kristo, la amo de Dio Patro kaj la komuneco de la Sankta Spirito estu kun vi ĉiuj.
K. Kaj kun via spirito.

Sekvas pentesprimo:

C. Gefratoj, ni konfesu niajn pekojn, por inde celebri sanktajn misterojn.

C.K. Mi konfesas al Dio ĉiopova kaj al vi, gefratoj, ke mi ege pekis per penso, parolo, faro kaj neglekto: mia kulpo, mia kulpo, mia tre granda kulpo. Tial mi petas la beatan Marian ĉiam virgan, ĉiujn Anĝelojn, la Sanktulojn kaj vin, gefratoj, preĝi por mi al nia Sinjoro Dio.

C. Kompatu nin la ĉiopova Dio, kaj pardoninte niajn pekojn, Li gvidu nin al la eterna vivo.
K. Amen.

C. Sinjoro, kompatu nin.
K. Sinjoro, kompatu nin.
C. Kristo, kompatu nin.
K. Kristo, kompatu nin.
C. Sinjoro, kompatu nin.
K. Sinjoro, kompatu nin.

C. Gloro al Dio en la altoj
C.K. kaj sur la tero paco al la homoj de lia bonvolo. Ni laŭdas Vin, ni benas Vin, ni adoras Vin, ni gloras Vin, ni dankas al Vi pro via granda gloro, Sinjoro Dio, ĉiela Reĝo, Dio Patro ĉiopova. Sinjoro, Filo ununaskita, Jesuo Kristo. Sinjoro Dio, Ŝafido de Dio, Filo de l´ Patro; kiu forigas la pekojn de l´ mondo, kompatu nin, kiu forigas la pekojn de ĺ mondo, akceptu nian petegon, kiu sidas dekstre de l´ Patro, kompatu nin. Ĉar Vi sola estas sankta, Vi sola Sinjoro, Vi sola Plejaltulo, Jesuo Kristo, kun la Sankta Spirito: en la gloro de Dio Patro. Amen.

C. Ni preĝu. (Post silenta preĝo sekvas la kolekto.)
K. Amen.


LITURGIO DE LA VORTO

Unua legaĵo
L. La legaĵo el la ..........
L. Jen la parolo de Dio.
K. Al Dio estu danko.

Responsoria psalmo

Dua legaĵo
L. La legaĵo el la ..........
L. Jen la parolo de Dio.
K. Al Dio estu danko.

Aklamo

Evangelio
C. Purigu mian koron kaj miajn lipojn, ĉiopova Dio, por ke mi povu inde anonci vian sanktan Evangelion.

C. La Sinjoro estu kun vi.
K. Kaj kun via spirito.
C. El la Evangelio laŭ sankta ..........
K. Gloro estu al Vi, Sinjoro.

(Sekvas teksto de la Evangelio)

C. Jen la parolo de la Sinjoro.
K. Al Kristo estu laŭdo.

C. Per la evangeliaj vortoj estu forviŝitaj niaj pekoj.

Homilio


KREDKONFESO

C. Mi kredas je unu Dio,
K. la Patro ĉiopova, Kreinto de la ĉielo kaj de la tero, de ĉiuj aĵoj videblaj kaj nevideblaj. Kaj je unu Sinjoro Jesuo Kristo, ununaskita Filo de Dio, kaj el la Patro generita antaŭ ĉiuj jarcentoj. Dio el Dio, Lumo el Lumo, Dio vera el Dio vera, generita, ne kreita, samsubstanca kun la Patro: per kiu ĉio estas farita. Kiu por ni homoj kaj por nia savo descendis de la ĉieloj. Kaj per la Sankta Spirito Li enkarniĝis el Maria, la Virgulino, kaj fariĝis homo. Krucumita por ni sub Poncio Pilato, Li mortis kaj estis entombigita. La trian tagon Li resurektis laŭ la Skriboj, ascendis al la ĉielo kaj sidas dekstre de la Patro. Kaj Li revenos kun gloro juĝi la vivantojn kaj la mortintojn kaj lia regno estos senfina. Mi kredas je la Sankta Spirito, Sinjoro kaj Viviganto, kiu devenas de la Patro kaj de la Filo. Kiu kun la Patro kaj la Filo same estas adorata kaj glorata; kiu parolis per la profetoj. Kaj je unu Eklezio: sankta, katolika kaj apostola. Mi konfesas unu bapton por la pardono de la pekoj. Kaj mi atendas la revivigon de la mortintoj kaj la vivon en la estonta mondo. Amen.


PROPETAJ PREĜOJ

I

C. Ĉiopova Dio, Vi estigis vian regnon sur la tero, por ke ĉiuj homoj estu unu en Vi kaj povu partopreni en la savo de via ununaskita Filo.

1. C. Por ke Vi gvidu ĉiujn kristanojn al la unueco de la kredo en via sankta Eklezio, ni preĝas al Vi:
K. Sinjoro, aŭskultu nin!
2. C. Por ke Vi faru nin la atestantoj de la kristana vivo en la mondo, ni preĝas al Vi:
K. Sinjoro, aŭskultu nin!
3. C. Por ke Vi donu al ni la ekkonon de nia propra kulpo pri la disigo de niaj fratoj, ni preĝas al Vi:
K. Sinjoro, aŭskultu nin!
4. C. Por ke Vi benu ĉiujn ekumenajn interrilatojn kaj fratajn dialogojn, ni preĝas al Vi:
K. Sinjoro, aŭskultu nin!
5. C. Por ke Vi donu al ĉiuj popoloj, kiuj suferas pro la milito kaj la interna malpaco, la justan pacon kaj la veran konkordon, ni preĝas al Vi:
K. Sinjoro, aŭskultu nin!
6. C. Por ke Vi donu al ni la efikan gracon por konvertiĝo al la serioza vivo laŭ via volo, ni preĝas al Vi:
K. Sinjoro, aŭskultu nin!
7. C. Por ke ni kapablu ĉiam kaj plenkonscie en viajn manojn transdoni nian vivon kun ties efektoj, ni preĝas al Vi:
K. Sinjoro, aŭskultu nin!
8. C. Por ke vi gardu mizerikorde .... (niajn gepatrojn, gefratojn, geamikojn, nian landon, nacion ktp.), ni preĝas al Vi:
K. Sinjoro, aŭskultu nin!
9. C. Por ke Vi donu la veran pacon kaj la nemensogan liberecon al niaj nacioj, ni preĝas al Vi:
K. Sinjoro, aŭskultu nin!
10. C. Por ke Vi savu nin de la plej danĝera malbono, kiun Vi pleje konas, ni preĝas al Vi:
K. Sinjoro, aŭskultu nin!
C. Ho, Dio, kiu estas unu en la Sankta Triunuo, gvidu ĉiujn homojn al la unueco kun Vi. Per Kristo, nia Sinjoro.
K. Amen.

II

C. Fervore ni preĝu, karaj gefratoj, al Dio, la Patro ĉiopova, kiu volas savi ĉiujn homojn kaj konduki ilin al la kono de la vero.

L. Ni kune preĝu dirante: Sinjoro, elaŭdu nin!
K. Sinjoro, elaŭdu nin!
1. L. Por la sankta Eklezio de Dio: por ke la Sinjoro gardu kaj disvastigu ĝin: ni preĝu al la Sinjoro.
K. Sinjoro, elaŭdu nin!
2. L. Por la popoloj de la tuta terglobo; por ke la Sinjoro bonvolu konservi inter ili konkordon: ni preĝu al la Sinjoro.
K. Sinjoro, elaŭdu nin!
3. L. Por ĉiuj, kiuj estas subpremataj de malfacilaĵoj: por ke la Sinjoro degnu helpi ilin: ni preĝu al la Sinjoro.
K. Sinjoro, elaŭdu nin!
4. L. Por ĉiu el ni mem kaj por nia komunumo: por ke la Sinjoro degnu akcepti nin ĉiujn kiel agrablan oferon: ni preĝu al la Sinjoro.
K. Sinjoro, elaŭdu nin!
C. Ĉiopova kaj eterna Dio, kiu volas ĉiujn savi, ke neniu pereu: elaŭdu do la preĝojn de via popolo kaj faru, ke la mondo estu gvidata de via paciga ordono kaj ke la Eklezio ĝuu trankvilajn tagojn en via servo. Per Kristo, nia Sinjoro.
K. Amen.


EŬKARISTIA LITURGIO

Ofero de la pano:
C. Benata estu, Sinjoro, Dio de la universo, ĉar de via boneco ni ricevis la panon, kiun ni oferas al Vi, frukton de la tero kaj de homa manlaboro, kiu fariĝos por ni la pano de la vivo.
K. Estu Dio eterne benata.

C. Per la mistero de ĉi tiuj akvo kaj vino ni fariĝu partoprenantoj en la dieco de tiu, kiu volis preni sur sin nian homan naturon.


Ofero de la vino:
C. Benata estu, Sinjoro, Dio de la universo, ĉar de via boneco ni ricevis la vinon, kiun ni oferas al Vi, frukton de vito kaj de homa manlaboro, kiu fariĝos por ni la spirita trinkaĵo.
K. Estu Dio eterne benata.

C. Kun humilo kaj pento ni petas, Sinjoro, ke Vi akceptu nin, kaj nia ofero tiel plenumiĝu antaŭ Vi hodiaŭ, ke ĝi plaĉu al Vi, Sinjoro Dio.
C. Forlavu, Sinjoro, mian kulpon kaj purigu min de mia peko.

Alvoko al la fideluloj:

C. Preĝu, gefratoj, ke mia kaj via ofero estu akceptinda ĉe Dio, la Patro ĉiopova.
K. La Sinjoro akceptu el viaj manoj ĉi tiun oferon por laŭdo kaj gloro de sia nomo, por utilo nia kaj de la tuta sankta Eklezio.

C. (Ofera preĝo. Fine de ĝi la popolo aklamas:)
K. Amen.


DUA EŬKARISTIA PREĜO

C. La Sinjoro estu kun vi.
K. Kaj kun via spirito.
C. Leviĝu viaj koroj!
K. Ni havas ilin ĉe la Sinjoro.
C. Ni danku al la Sinjoro, nia Dio!
K. Estas inde kaj juste.

C. Vere estas inde kaj juste, ĝuste kaj save, ke ni ĉiam kaj ĉie danku Vin, sankta Patro, per via plej amata Filo, Jesuo Kristo, via vivanta Vorto. Pere de Li Vi ĉion kreis kaj Lin al ni sendis kiel Savanton kaj Elaĉetanton, enkarniĝintan per la Sankta Spirito kaj el Virgulino Maria naskiĝintan. Li, plenumante vian volon kaj akirante al Vi sanktan popolon, etendis la manojn sur la kruco; mortante, Li detruis la morton kaj anoncis la resurekton. Pro tio kune kun la Anĝeloj kaj ĉiuj Sanktuloj vian gloron ni proklamas, unuvoĉe dirante:

C.K. Sankta, sankta, sankta estas la Sinjoro, Dio de legiaroj. Plenas de via gloro la ĉielo kaj la tero. Hosana en la altoj! Benata, kiu venas en la nomo de la Sinjoro. Hosana en la altoj!

C. Vere Sankta Vi estas, Sinjoro, fonto de ĉiu sankteco. Ni petas do: sanktigu ĉi tiujn donacojn per la roso de via Spirito, por ke ili fariĝu por ni la Korpo † kaj la Sango de nia Sinjoro Jesuo Kristo.

Kiam Li estis fordononta sin memvole al la pasiono, Li prenis la panon kaj dankante rompis kaj donis ĝin al siaj disĉiploj, dirante:

PRENU KAJ MANĜU EL ĜI VI ĈIUJ: ĈAR TIO ESTAS MIA KORPO, KIU POR VI ESTOS OFERDONATA.

Simile post la vespermanĝo, prenante ankaŭ la kalikon kaj denove dankante, Li donis ĝin al siaj disĉiploj, dirante:

PRENU KAJ TRINKU EL ĜI VI ĈIUJ: ĈAR TIO ESTAS LA KALIKO DE MIA SANGO, DE LA NOVA KAJ ETERNA TESTAMENTO, KIU POR VI KAJ POR MULTAJ ESTOS VERŜATA POR FORIGO DE LA PEKOJ. FARU TION JE MIA REMEMORO.

C. Jen la mistero de la kredo!
K. Ni anoncas vian morton, Sinjoro, kaj konfesas vian resurekton, ĝis kiam Vi revenos en gloro.

C. Memorante pri lia morto kaj resurekto, ni oferas al Vi, Sinjoro, la panon de vivo kaj la kalikon de la savo, dankante, ke Vi konsideris nin indaj stari antaŭ Vi kaj servi al Vi.

Kaj humile ni petegas, ke partoprenante en la Korpo kaj la Sango de Kristo, ni unuiĝu per la Sankta Spirito.

Rememoru, Sinjoro, vian Eklezion disvastigitan tra la tuta mondo kaj perfektigu ĝin en la karitato kune kun nia Papo N., nia Episkopo N., kaj la tuta klerikaro.

Memoru ankaŭ niajn gefratojn, kiuj endormiĝis en la espero pri la resurekto, kaj ĉiujn, kiuj mortis en via kompato; kaj akceptu ilin en la lumon de via vizaĝo.

Kompatu nin ĉiujn, ni petas, ke kun beata Dipatrino virga Maria, kun la beataj Apostoloj kaj kun ĉiuj Sanktuloj, kiuj surtere plaĉis al Vi, ni meritu partopreni la eternan vivon, laŭdi kaj glori Vin. Per via Filo Jesuo Kristo.

C. Per Kristo, kun Kristo kaj en Kristo, al Vi, Dio Patro ĉiopova, en unueco kun la Sankta Spirito, estu ĉiu honoro kaj gloro eterne.
K. Amen.


TRIA EŬKARISTIA PREĜO

C. Patro vere sankta, prave laŭdas Vin la tuta kreitaro de Vi farita, ĉar per Jesuo Kristo, via Filo kaj nia Sinjoro, en la potenco de la Sankta Spirito, Vi ĉion vivigas kaj sanktigas; kaj Vi senĉese kunigas al Vi la popolon, por ke de la oriento ĝis la okcidento estu donata al via nomo sankta oferaĵo.

Nun humile ni petegas Vin, Patro: Sendu vian Spiriton sanktigi ĉi tiujn donojn, kiujn ni konsekris al Vi, por ke ili fariĝu la Korpo † kaj la Sango de Jesuo Kristo, via Filo kaj nia Sinjoro, kiu ordonis al ni celebri ĉi tiujn misterojn.

C. En la nokto, en kiu Li estis perfidita, Li prenis la panon kaj al Vi dankante, benis ĝin, rompis kaj donis al siaj disĉiploj, dirante:

PRENU KAJ MANĜU EL ĜI VI ĈIUJ: ĈAR TIO ESTAS MIA KORPO, KIU POR VI ESTOS OFERDONATA.

Simile post la vespermanĝo, Li prenis la kalikon kaj al Vi dankante benis ĝin kaj donis al siaj disĉiploj, dirante:

PRENU KAJ TRINKU EL ĜI VI ĈIUJ: ĈAR TIO ESTAS LA KALIKO DE MIA SANGO, DE LA NOVA KAJ ETERNA TESTAMENTO, KIU POR VI KAJ POR MULTAJ ESTOS VERŜATA POR FORIGO DE LA PEKOJ. FARU TION JE MIA REMEMORO.

C. Jen la mistero de la kredo!
K. Ni anoncas vian morton, Sinjoro, kaj konfesas vian resurekton, ĝis kiam Vi revenos en gloro.

C. Pro tio memorante pri la savodona pasiono de via Filo, pri lia mirinda resurekto kaj ĉieleniro, kaj atendante lian duan alvenon, ni prezentas al Vi, Sinjoro, kiel dankesprimon, ĉi tiun vivan kaj sanktan oferdonon.

Rigardu favore kaj agnosku en la ofero de via Eklezio la Viktimon, per kies oferdono Vi volis repaciĝi; kaj al ni, kiuj nutriĝas per la Korpo kaj la Sango de via Filo, donu la plenecon de la Sankta Spirito, kiu igu nin unu korpo kaj unu spirito en Kristo.

C. Li mem faru el ni eternan donon de Vi ŝatatan, por ke ni povu akiri la promesitan regnon kun viaj elektitoj: kun beata Maria, la Virgulino kaj Dipatrino, kun viaj beataj Apostoloj kaj glorplenaj Martiroj, (kun sankta N.) kaj kun ĉiuj Sanktuloj, niaj perantoj ĉe Vi.

Pro tiu ĉi repaciga ofero ni petas Vin, Patro, donu al tuta mondo pacon kaj savon. Firmigu en kredo kaj amo vian Eklezion pilgrimantan sur la tero: kun via servanto, nia Papo N., kun nia Episkopo N., kun la tuta episkoparo, kun la klerikaro kaj la popolo, kiun Vi elaĉetis. Aŭskultu favore la preĝojn de ĉi tiu familio, kiun Vi kunvokis. Kaj ĉiujn viajn disigitajn filojn, amema Patro, kompate rekunigu.

Indulge akceptu en vian regnon niajn forpasintajn gefratojn kaj ĉiujn, kiuj forlasis la mondon en paco kun Vi. Plenumu nian esperon: ke ni povu kun ili por ĉiam vivi kaj ĝui vian eternan gloron, per Kristo, nia Sinjoro, pere de kiu Vi, ho Dio, donas al la mondo ĉion bonan.

Per Kristo, kun Kristo kaj en Kristo, al Vi, Dio Patro ĉiopova, en unueco kun la Sankta Spirito, estu ĉiu honoro kaj gloro eterne.
K. Amen.


RITO DE LA KOMUNIO

C. Per savaj ordonoj admonitaj kaj per Dia instruo formitaj ni kuraĝas preĝi:

C.K. Patro nia, kiu estas en la ĉielo, sanktigata estu via nomo. Venu via regno. Fariĝu via volo, kiel en la ĉielo, tiel ankaŭ sur la tero. Nian panon ĉiutagan donu al ni hodiaŭ kaj pardonu al ni niajn ŝuldojn, kiel ankaŭ ni pardonas al niaj ŝuldantoj. Kaj ne konduku nin en tenton, sed liberigu nin de la malbono.

C. Liberigu nin, ni petas, Sinjoro, de ĉiuj malbonoj; donu favore pacon en niaj tagoj, por ke, helpitaj de via kompato, ni estu ĉiam liberaj de la peko kaj sekuraj kontraŭ ĉiu danĝero, atendante la beatan esperon kaj la alvenon de nia Savanto, Jesuo Kristo.
K. Ĉar via estas la regno kaj la potenco kaj la gloro eterne.

C. Sinjoro Jesuo Kristo, kiu diris al viaj Apostoloj: “Pacon mi lasas al vi, mian pacon mi donas al vi”, ne atentu niajn pekojn, sed la fidelecon de via Eklezio; kaj degnu laŭ via volo pacigi kaj unuigi ĝin. Vi, kiu vivas kaj regas eterne.
K. Amen.

C. La paco de la Sinjoro estu kun vi ĉiam.
K. Kaj kun via spirito.
C. Interŝanĝu la pacosignon.

La kunigo de la Korpo kaj de la Sango de nia Sinjoro Jesuo Kristo donu al ni, kiuj ĝin ricevas, la eternan vivon.

K. Ŝafido de Dio, kiu forigas la pekojn de l´ mondo, kompatu nin.
Ŝafido de Dio, kiu forigas la pekojn de l´ mondo, kompatu nin.
Ŝafido de Dio, kiu forigas la pekojn de l´ mondo, donu al ni la pacon.

C. Sinjoro Jesuo Kristo, Filo de Dio vivanta, kiu pro la patra volo kaj la kunagado de la Sankta Spirito vivigas la mondon per via morto, liberigu min per viaj sanktaj Korpo kaj Sango de ĉiuj miaj malvirtoj kaj sennombraj malbonoj kaj faru, ke mi ĉiam observu viajn ordonojn, kaj ne permesu al mi iam de Vi foriri.

Jen la Ŝafido de Dio, jen tiu, kiu forigas la pekojn de l´ mondo. Beataj la alvokitoj al la festeno de la Ŝafido.

C.K. Sinjoro, mi ne estas inda, ke Vi eniru sub mian tegmenton, sed diru nur unu vorton kaj resaniĝos mia animo.

C. La Korpo de Kristo gardu min por la eterna vivo.
La Sango de Kristo gardu min por la eterna vivo.

La Korpo de Kristo.
K. Amen.

C. Tion, kion ni prenis per la buŝo, Sinjoro, ni akceptu per pura menso; kaj la portempa donaco fariĝu por ni la eterna savilo.

Ni preĝu:
(Sekvas postkomunia preĝo.)
K. Amen.


FINA RITO

C. La Sinjoro estu kun vi!
K. Kaj kun via spirito.

C. Benu vin la ĉiopova Dio: la Patro kaj la Filo † kaj la Sankta Spirito.
K. Amen.

C. La meso finiĝis: iru en paco!
K. Al Dio estu danko!

(PRAKTIKA KOMPENDIO DE LA ĈEĤA IKUE-SEKCIO)

Nokta preĝo malgranda formo de la Kompletorio

MALFERMO DE LA NOKTA PREĜO

Dio, atentu helpi min.
Rapidu subteni min.

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PRIPENSADO
Tie ĉi estas okazo, ke oni per mallonga silenta pripenso rigardas
al la pasinta tago kaj petas pri pardono pro ĉiuj neglektoj kaj eraroj.
Oni povas ekzemple preĝi:
Sinjoro Jesuo Kristo, kompatu min.

PSALMO 134: NOKTA LAŬDO EN LA TEMPLO
Nun benu la Eternulon, *
ĉiuj sklavoj de la Eternulo,
kiuj en la noktoj *
staras en la domo de la Eternulo.
Levu la manojn al la sanktejo, *
kaj benu la Eternulon.
El Cion benu vin la Eternulo, *
la Kreinto de la ĉielo kaj la tero.
Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PREĜO AL PSALMO 134
Sankta Dio, ni gloras Vin dum la tago kaj en la nokta silento.
Akceptu nian laŭdon, kaj benu nin. Amen.

LEGAĴO EL LA APOKALIPSO (Ap 22,4-5)
Ili vidos Lian vizaĝon;
kaj Lia nomo estos sur ilia frunto.
Kaj nokto ne plu ekzistos;
kaj ili ne bezonas lumon de lampo, nek lumon de suno;
ĉar Dio, la Sinjoro, lumos al ili;
kaj ili reĝos por ĉiam kaj eterne.

LAŬDKANTO DE SIMEON – NUNC DIMITTIS (Luk 2,29-32)
Nun, ho Eternulo, Vi ellasas Vian servanton, *
laŭ Via vorto, en paco,
ĉar miaj okuloj vidis Vian savon, *
kiun Vi preparis antaŭ la vizaĝo de ĉiuj popoloj,
lumon por malkaŝo al la gentoj, *
kaj gloron de Via popolo Izrael.

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PREĜO

sabate:
Dio,
restu ĉe ni en tiu ĉi nokto.
Kaj kiam ni leviĝos matene,
ni memoru kun ĝojo la resurekton de Via Filo,
kiu vivas kaj regas kun Vi nun kaj eterne. Amen.

dimanĉe:
Ĉiopova Dio,
ni celebris hodiaŭ la misteron de la resurekto de nia Sinjoro.
Vespere ni vokas al Vi:
ŝirmu nin en tiu ĉi nokto kontraŭ ĉia malbono.
Faru, ke ni ripozu en Via paco
kaj ke ni komencu la morgaŭan tagon per Via laŭdo.
Tion ni petas per Jesuo Kristo, nia Sinjoro. Amen.

lunde:
Dio, donu al ni trankvilan nokton kaj ripozigan dormon.
Kaj tion, kion ni semis hodiaŭ per vortoj kaj agoj,
Vi enradikigu kaj kreskigu;
kaj Vi maturigu ĝin por la eterna rikolto.
Tion ni petas per Kristo, nia Sinjoro. Amen.

marde:
Afabla Patro,
Vi estu nia lumigilo en la nokta mallumo.
Donu ke ni dormu en paco,
por ke morgaŭ ni ĝoje leviĝu en Via nomo.
Tion ni petas per Kristo, nia Sinjoro. Amen.

merkrede:
Sinjoro Jesuo Kristo,
Vi estas afabla kaj kore humila.
La jugo, kiun Vi metas sur Viajn sekvantojn, ne estas prema,
kaj Via ŝarĝo estas malpeza.
Favore akceptu, kion ni planis hodiaŭ kaj kion ni plenumis.
Renovigu nin per la nokta trankvilo,
kaj igu nin morgaŭ pli fervoraj en Via servo.
Kiu vivas kaj regas eterne. Amen.

ĵaŭde:
Dio,
sendu al ni en tiu ĉi nokto trankvilan dormon,
por ke post la penoj de la tago ni refreŝiĝu,
kaj morgaŭ servu al Vi per nova forto.
Tion ni petas per Jesuo Kristo, nia Sinjoro. Amen.

vendrede:
Ĉiopova Dio,
Via sole-naskita Filo descendis en la nokton de la morto, kaj resurektis.
Donu, ke ni restu dum ĉiuj tagoj ligitaj al Li per la fido,
por ke ni reviviĝu kun Li al nova vivo.
Tion ni petas per Li, Kristo, nia Sinjoro. Amen.

FERMO DE LA NOKTA PREĜO
Nokton trankvilan kaj finon bonan
donu al ni la ĉiopova Dio,
la Patro kaj la Filo kaj la Sankta Spirito. Amen.

Vespera preĝo malgranda formo de la Vespera laŭdo

MALFERMO DE LA VESPERA PREĜO

Dio, atentu helpi min.
Rapidu subteni min.

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.


HIMNO

Zorga Kreinto!
Homo Vin laŭdu
mense kaj kore,
pacon amante,
li – rimarkinda
parto de l' mondo.

Sola li estas
bildo impona
de Vi, Kreinto,
se li nur vivas
pura en koro,
sankta en menso.

Koro kaj buŝo
ĉiam Vin laŭdu,
Dio lumanta.
Ĉiam ni amu
Vin, kiu estas
ĉie la Sankta.


PSALMO 113: DIO, LA MAJESTA KAJ FAVORA

Gloru, sklavoj de la Eternulo, *
gloru la nomon de la Eternulo.
La nomo de la Eternulo estu benata *
de nun kaj eterne.

De la leviĝejo de la suno ĝis ĝia malleviĝejo *
estas glorata la nomo de la Eternulo.
Alte super ĉiuj popoloj estas la Eternulo; *
super la ĉielo estas Lia gloro. —

Kiu estas kiel la Eternulo, nia Dio, *
kiu sidas alte,
kiu kliniĝas por rigardi *
la ĉielon kaj la teron,
kiu el la polvo restarigas mizerulon, *
el la koto levas malriĉulon,
por sidigi lin kun eminentuloj, *
kun la eminentuloj de lia popolo?

Li donas familion al senfruktulino, *
kaj faras ŝin ĝoja patrino de infanoj. —

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.


PREĜO AL PSALMO 113

Fidela Dio, Vi rigardis nian humilecon
kaj adoptis nin en Jesuo Kristo.
Konservu en ni la ĝojon pri la saviĝo. Amen.

AŬ: PSALMO 139, 1-3.13-18: LA HOMO ANTAŬ LA ĈIOSCIA DIO

Ho Eternulo, Vi min esploras kaj min konas. /
Vi scias, kiam mi sidas kaj kiam mi leviĝas; *
Vi komprenas mian penson de malproksime.
Kiam mi iras kaj kiam mi ripozas, Vi estas ĉirkaŭ mi, *
kaj ĉiujn miajn vojojn Vi konas.
Ĉar Vi kreis mian internaĵon, *
formis min en la ventro de mia patrino. —

Mi gloras Vin, ĉar mi estas mirinde kreita; /
mirindaj estas Viaj kreitaĵoj, *
kaj mia animo tion bone konscias.
Ne estis kaŝitaj antaŭ Vi miaj ostoj, /
kiam mi estis kreata en kaŝiteco, *
kiam mi estis formata en la profundo de la tero.

Mian embrion vidis Viaj okuloj, /
kaj en Via libro estis enskribitaj ĉiuj tagoj destinitaj, *
kiam ankoraŭ eĉ unu ne ekzistis. —
Kiel grandvaloraj estas por mi Viaj pensoj, ho Dio! *
Kiel granda estas ilia nombro!
Se mi ilin kalkulus, ili estus pli multaj ol la sablo; *
kiam mi vekiĝas, mi estas ankoraŭ kun Vi. —

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.


PREĜO AL PSALMO 139

Dio, nia Patro, Vi konas niajn pensojn kaj vortojn;
Vi estas plej intime en nia koro.
Ni dankas al Vi, ke Vi nin kreis kaj vokis en Vian proksimecon.
Per Kristo, nia Sinjoro. Amen.


LEGAĴO EL LA EPISTOLO AL LA KOLOSEANOJ (laŭ Kol 1,23)

Vi efektive restu en la fido,
fonditaj kaj fiksitaj kaj firmaj en la espero de la evangelio, kiun vi aŭdis,
kiu estas predikita tra la tuta kreitaro sub la ĉielo.


LAŬDKANTO DE MARIA – MAGNIFICAT (Luk 1,46-55)

Mia animo altigas la Eternulon, *
kaj mia spirito ĝojis en Dio, mia Savanto,
ĉar Li rigardis la humilecon de Sia sklavino; *
ĉar jen de nun ĉiuj generacioj nomos min feliĉa.

Ĉar la Potenculo faris al mi grandaĵojn, *
kaj sankta estas Lia nomo.
Kaj Lia boneco estas por ĉiuj generacioj *
al tiuj, kiuj Lin timas. —

Li montris forton per Sia brako, *
Li dispelis fierulojn en la penso de ilia koro.
Li malaltigis potenculojn de iliaj tronoj, *
kaj Li altigis humilulojn.

Malsatulojn Li plenigis per bonaĵo, *
kaj riĉulojn Li forsendis malplenaj. —
Li helpis Sian servanton Izrael, *
memorante Sian korfavoron.
Kiel Li parolis al niaj patroj, *
al Abraham kaj al lia idaro eterne. —

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.


PORPETOJ

Mi petas …
por ĉiuj, kiuj estas en mizeroj
por ĉiuj, kiuj suferas perforton
por ĉiuj, de kies decidoj multo dependas
por ĉiuj, kiuj ne scias kiel pluvivi
por ĉiuj, kiuj apogas min en la ĉiutagaĵoj
por …
por niaj mortintoj
Bona Dio, benu miajn parencojn kaj konatojn.


FERMO DE LA VESPERA PREĜO

Patro nia, kiu estas en la ĉielo,
sanktigata estu Via nomo.
Venu Via regno.
Fariĝu Via volo,
kiel en la ĉielo, tiel ankaŭ sur la tero.

Nian panon ĉiutagan donu al ni hodiaŭ.
Kaj pardonu al ni niajn ŝuldojn,
kiel ankaŭ ni pardonas al niaj ŝuldantoj.
Kaj ne konduku nin en tenton,
sed liberigu nin de la malbono.

Ĉar Via estas la regno
kaj la potenco
kaj la gloro
eterne.

Amen.

Tagmeza preĝo malgranda formo de la Meza horo

MALFERMO DE LA TAGMEZA PREĜO

Dio, atentu helpi min.
Rapidu subteni min.

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PSALMO 121: LA GARDANTO DE IZRAEL

Mi levas miajn okulojn al la montoj: *
De kie venas al mi helpo?
Mia helpo venas de la Eternulo, *
kiu kreis la ĉielon kaj la teron.

Li ne lasos vian piedon falpuŝiĝi; *
via gardanto ne dormetas.
Jen ne dormetas kaj ne dormas *
la gardanto de Izrael.

La Eternulo estas via gardanto; †
la Eternulo estas via ombro *
ĉe via dekstra mano.
En la tago la suno vin ne frapos, *
nek la luno en la nokto.
La Eternulo vin gardos de ĉia malbono, *
Li gardos vian animon.
La Eternulo gardos vian eliron kaj eniron, *
de nun kaj eterne.

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PREĜO AL PSALMO 121

Fidela Dio, tage kaj nokte Vi gardas pri nia vivo.

Gvidu nin en Vian lumon, kiu ne konas vesperon. Amen.

LEGAĴO EL LA EPISTOLO DE LA APOSTOLO PAŬLO AL LA EFESANOJ (Efe 4,1-6)

Mi do, malliberulo pro la Sinjoro, petegas vin,
ke vi iradu inde je la voko, en kiu vi estas vokitaj,
kun ĉia humileco kaj mildeco,
kun toleremeco,
paciencante unu al alia en amo,
penante konservi la unuecon de la Spirito en la ligilo de paco.
Estas unu korpo, kaj unu Spirito,
kiel ankaŭ vi estas vokitaj en unu espero de via voko;
unu Sinjoro, unu fido, unu bapto,
unu Dio kaj Patro de ĉiuj,
kiu estas super ĉiuj,
kaj tra ĉiuj,
kaj en ĉiuj.

HIMNO

De Vi, ho ordiganta Di',
donatas je dispon' al ni
matene milda lumo-ben',
tag-meze fajra suno-plen'.

Estingu flamojn de pasi',
bruladon de malharmoni'.
Malsana ardo restu for,
kaj nestu pac' en nia kor'.

Ho Patro, Filo, kaj Spirit',
asistu nin sen intermit'.
Vin laŭdas nun la klar' de l' tag',
Vin ĉiam gloru nia ag'.

Psalmo: 51

Korfavoru min, ho Dio, laŭ Via boneco;
Laŭ Via granda kompatemeco elstreku miajn pekojn.
Lavu min tute pure de mia krimo,
Kaj purigu min de mia peko. –

Ĉar miajn kulpojn mi konsciadas;
Kaj mia peko estas ĉiam antaŭ mi.
Antaŭ Vi sola mi pekis,
Kaj mi faris tion, kio estas malbona antaŭ Viaj okuloj;
Tial Vi estas justa en Via vorto
Kaj pura en Via juĝo.
Mi estas ja naskita en krimo;
Kaj en peko gravediĝis per mi mia patrino. –

Vi amas ja veron en la koro,
Kaj en kaŝiteco Vi aperigas al mi saĝon.
Senpekigu min per hisopo, kaj mi fariĝos pura;
Lavu min, kaj mi estos pli blanka ol neĝo.
Aŭdigu al mi ĝojon kaj gajecon,
Kaj regajiĝos la ostoj, kiujn Vi batis.
11 Kaŝu Vian vizaĝon de miaj pekoj,
Kaj ĉiujn miajn krimojn elstreku. –

Koron puran kreu al mi, ho Dio,
Kaj spiriton fidelan novigu en mi.
Ne forpuŝu min de Via vizaĝo,
Kaj Vian sanktan spiriton ne forprenu de mi.
Redonu al mi la ĝojon de Via helpo;
Kaj spirito bonfara fortikigu min. –

Mi instruos al la krimuloj Vian vojon;
Kaj pekuloj revenos al Vi.
Liberigu min de sango, ho Dio, Dio de mia savo;
Mia lango kantos Vian justecon.
Ho, mia Sinjoro, malfermu miajn lipojn;
Kaj mia buŝo rakontos Vian gloron.
Ĉar Vi ne deziras oferdonon, alie mi ĝin donus;
Brulofero ne plaĉas al Vi.
Oferdonoj al Dio estas spirito suferanta;
Koron suferantan kaj humilan Vi, ho Dio, ne malŝatas. –

Bonfaru al Cion laŭ Via favoro,
Konstruu la murojn de Jerusalem;
Tiam plaĉos al Vi oferdonoj de pieco, brulofero kaj plenofero;
Tiam oni metos sur Vian altaron junajn bovojn.

Psalmo: 23

La Eternulo estas mia paŝtisto; mi mankon ne havos.
Sur verdaj herbejoj Li ripozigas min,
Apud trankvilaj akvoj Li kondukas min.
Li kvietigas mian animon;
Li kondukas min laŭ vojo de la vero,
Pro Sia nomo.
Eĉ kiam mi iros tra valo de densa mallumo,
Mi ne timos malbonon,
Ĉar Vi estas kun mi;
Via bastono kaj apogiĝilo
Trankviligos min. –

Vi kovras por mi tablon
Antaŭ miaj malamikoj;
Vi ŝmiris per oleo mian kapon,
Mia pokalo estas plenigita.
Nur bono kaj favoro sekvos min
En la daŭro de mia tuta vivo;
Kaj mi restos en la domo de la Eternulo
Eterne.

Psalmo: 91

Kiu loĝas sub la ŝirmo de la Plejaltulo,
Tiu ripozas en la ombro de la Plejpotenculo.
Mi diras al la Eternulo: Mia rifuĝejo kaj mia fortikaĵo
Estas Dio, kiun mi fidas.
Ĉar Li savos vin de la reto de kaptisto,
De la pereiga pesto.
Per Siaj plumoj Li ŝirmos vin,
Kaj sub Liaj flugiloj vi rifuĝos;
Lia fideleco estas ŝildo kaj kiraso.
Ne timu la teruron de nokto,
Nek sagon, kiu flugas tage,
Nek peston, kiu iras en mallumo,
Nek epidemion, kiu ekstermas tagmeze.
Ĉe via flanko falos milo,
Kaj dek miloj ĉe via dekstra flanko;
Sed vin ĝi ne tuŝos.
Vi nur rigardos per viaj okuloj,
Kaj vi vidos la redonon al la malvirtuloj.
Ĉar Vi, ho Eternulo, estas mia defendo!
La Plejaltulon vi elektis kiel vian rifuĝejon.
Ne trafos vin malbono,
Kaj frapo ne atingos vian tendon.
Ĉar al Siaj anĝeloj Li ordonis pri vi,
Ke ili vin gardu sur ĉiuj viaj vojoj.
Sur la manoj ili vin portos,
Por ke vi ne falpuŝiĝu sur ŝtono per via piedo.
Sur leonon kaj aspidon vi paŝos,
Vi piedpremos leonidon kaj drakon. –

Ĉar li ekamis Min, tial Mi lin savos;
Mi defendos lin, ĉar li konas Mian nomon.
Li vokos Min, kaj Mi lin aŭskultos;
estos kun li en mizero;
Mi lin liberigos kaj honoratigos.
Mi satigos lin per longa vivo,
Kaj aperigos al li Mian helpon.

La ora regulo

Ĉion ajn do, kion vi deziras, ke la homoj faru al vi, vi ankaŭ faru al ili; ĉar ĉi tio estas la leĝo... Mateo 7,12

Vi estos trankvila, ĉar ekzistas espero

Tiam vi forgesos mizeron;
Vi rememoros ĝin kiel forfluintan akvon.
Kaj via vivo leviĝos pli hele ol la tagmezo,
La mallumo fariĝos kiel mateno.
Kaj vi estos trankvila, ĉar ekzistas espero;
Vi rigardos ĉirkaŭen, kaj iros dormi en sendanĝereco.
Vi kuŝos, kaj neniu vin timigos;
Kaj multaj serĉos vian favoron.

(Biblio - Ijob, Ĉapitro 11:16-19)

KIEL EDUKI HULIGANON

1. Donu al via infano ekde la naskiĝo ĉion, kion ĝi volas!
2. Faru ĉiam tion, kion devus fari la infano! Kiam ĝi ne ordigis siajn ludilojn, vi ilin ordigu.
La infano ekkomprenos, ke la respondecon ne havas ĝi, sed alia homo.
3. Al la infano ĉion permesu. Ĉion legi, ĉion vidi en la televido. Ĝi devas akiri sperton kaj ekkoni, kio estas por ĝi bona kaj malbona.
4. Ridu, kiam la infano parolas vulgare. La infano ekkomprenos, ke ĝi estas saĝa kaj sprita.
5. Diru nenion al la infano pri Dio. Vivvaloron kaj mondideon ĝi devas trovi mem.
6. Ne diru al la infano, ke ĝi faras ion malbone. Neniam! Ĝi povus havi malbonan konsciencon kaj tio ne estas sana.
7. Viajn konfliktojn vi ĉiam solvu en ĉeesto de la infano! Ĝi havos bonan modelon por sia geedziĝo.
8. Donu al ĝi tiom da mono, kiom ĝi volas! Konsterniĝu, se ĝi devus labori.
9. Donu al la infano perfektan komforton! Por ke ĝi ne havu neŭrozon kaj minuskompleksojn.
10. Ĉiam defendu vian infanon! Kontraŭ instruistoj, najbaroj, polico. Ĝi havos ĉiam senton,
ke ĝi pravas.

La apostola kredsimbolo

Mi kredas je Dio,
la Patro ĉiopova,
la Kreinto de la ĉielo kaj la tero;
kaj je Jesuo Kristo,
lia unusola Filo,
nia Sinjoro,
kiu estis koncipita de la Sankta Spirito,
naskiĝis el Virgulino Maria,
suferis sub Poncio Pilato
kaj estis krucumita,
mortis kaj estis entombigita;
Li descendis al la infero,
la trian tagon Li reviviĝis,
ascendis en la ĉielon,
eksidis ĉe la dekstro de Dio,
la Patro ĉiopova,
de tie Li revenos por juĝi la vivantojn kaj la mortintojn.
Mi kredas je la Sankta Spirito,
je la sankta katolika Eklezio,
je la unueco de la sanktuloj,
je la pardono de la pekoj,
je la reviviĝo de la korpoj,
je la eterna vivo.
Amen.

Oh! Happy Day

Mirinda!

Mizerikordon!

“Mia Dio, mi pentas en la profundo de mia koro pro miaj ofendoj al Vi, ĉar Vi estas tre bona kaj amebla. Mi promesas, per Via Graco, klopodi esti bona. Mia Jesuo, mizerikordon!”

Pripensu la liliojn de la kampo...

25 Tial mi diras al vi: Ne zorgu pri via vivo, kion vi manĝu, aŭ kion vi trinku; nek pri via korpo, kion vi surmetu. Ĉu la vivo ne estas pli ol nutraĵo, kaj la korpo pli ol vestaĵo? 26 Rigardu la birdojn de la ĉielo, ke ili ne semas, nek rikoltas, nek kolektas en grenejojn, kaj via Patro ĉiela ilin nutras. Ĉu vi ne multe pli valoras ol ili? 27 Kaj kiu el vi per zorgado povas aldoni unu ulnon al sia staturo? 28 Kaj kial vi zorgas pri vestaĵo? Pripensu la liliojn de la kampo, kiel ili kreskas: ili ne laboras, nek ŝpinas; 29 tamen mi diras al vi, ke eĉ Salomono en sia tuta gloro ne estis ornamita, kiel unu el ĉi tiuj. 30 Sed se Dio tiel vestas la kampan herbaĵon, kiu ekzistas hodiaŭ, kaj morgaŭ estos ĵetata en fornon, kiom pli certe Li vestos vin, ho malgrandfiduloj? 31 Tial ne zorgu, dirante: Kion ni manĝu? aŭ: Kion ni trinku? aŭ: Kion ni surmetu? 32 Ĉar pri ĉio tio serĉas la nacianoj; ĉar via Patro ĉiela scias, ke vi bezonas ĉion tion. 33 Sed celu unue Lian regnon kaj Lian justecon, kaj ĉio tio estos aldonita al vi. 34 Tial ne zorgu pri la morgaŭa tago, ĉar la morgaŭa tago zorgos pri si mem. Sufiĉa por la tago estas ĝia propra malbono. Mateo (Ĉapitro: 6.25-34)

Kiu el vi estas senpeka, tiu unua ĵetu sur ŝin ŝtonon

1 sed Jesuo iris al la monto Olivarba. 2 Kaj li revenis frumatene en la templon, kaj la tuta popolo venis al li; kaj li sidiĝis, kaj instruadis ilin. 3 Kaj la skribistoj kaj Fariseoj alkondukis virinon, kaptitan en adulto; kaj stariginte ŝin en la mezo, 4 ili diris al li: Majstro, ĉi tiu virino estas kaptita adultante, en la faro mem. 5 En la leĝo Moseo ordonis al ni tiajn ŝtonmortigi; sed kion vi diras? 6 Kaj tion ili diris, provante lin, por povi lin akuzi pri io. Sed Jesuo sin klinis, kaj per fingro skribis sur la tero. 7 Kiam ili ankoraŭ demandis lin, li leviĝis, kaj diris al ili: Kiu el vi estas senpeka, tiu unua ĵetu sur ŝin ŝtonon. 8 Kaj denove li sin klinis kaj skribis sur la tero. 9 Sed aŭdinte tion, ili eliris unu post alia, komencante de la plej maljunaj kaj ĝis la lastaj; kaj restis Jesuo sola, kaj la virino staranta en la mezo. 10 Kaj Jesuo leviĝis, kaj diris al ŝi: Virino, kie ili estas? ĉu neniu vin kondamnis? 11 Kaj ŝi diris: Neniu, Sinjoro. Jesuo diris al ŝi: Ankaŭ mi vin ne kondamnas; iru, kaj de nun ne plu peku. Johano, 8.1-11.

Pekkonfeso

Matena preĝo malgranda formo de la Matena laŭdo

Sinjoro, malfermu miajn lipojn;
Kaj mia buŝo rakontos Vian gloron.

Gloro al la Patro kaj al la Filo
kaj al la Sankta Spirito
Kiel en la komenco, tiel nun kaj ĉiam
kaj en eterno. Amen. Haleluja.

HIMNO
Vidu, la noktaj ombroj jam paliĝas,
ruĝe ekglimas lumo de l' aŭroro.
Ni do per pia voĉ' al Dio preĝu,
nia Sinjoro.

Li nin kompatu el profunda amo,
savon koncedu, kaj forpelu lacon,
pro Sia bono por eterne donu
al ni la pacon.

Dio la Patro, Filo kaj Spirito
tion al ni donacu kun favoro,
al kies laŭdo sonas en la mondo
kantoj de gloro.

PSALMO 36,6-10: DIO, LA FONTO DE LA VIVO
Ho Eternulo, ĝis la ĉielo atingas Via boneco, *
Via vereco ĝis la nuboj.
Via justeco estas kiel la montoj de Dio, † Viaj juĝoj
estas granda abismo; *
homon kaj bruton Vi helpas, ho Eternulo.

Kiel grand-valora estas Via favoro, ho Dio! *
Kaj la homidoj ricevas rifuĝon en la ombro de
Viaj flugiloj.
Ili satiĝas per la riĉa havo de Via domo, *
kaj el la rivero de Viaj bonaĵoj Vi ilin trinkigas.

Ĉar ĉe Vi estas la fonto de vivo, *
kaj en Via lumo ni vidas lumon.

Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PREĜO AL PSALMO 36
Ĉiopova Dio,
per Via vivanta Vorto Vi ĉion vokis, por ke ĝi ekzistu.
Homoj kaj brutoj estas ŝirmataj en Vi.
Gardu Vian kreitaĵon kontraŭ ĉiuj detruaj potencoj.
Pri tio ni petas per Kristo, nia Sinjoro. Amen.

LEGAĴO EL LA LIBRO TOBIT (Tob 4,15a.16a.18-19)
Kion vi malŝatas, al alia tion ne faru.
Donu manĝon al malsatanto, kaj vestaĵojn al nuduloj.
Serĉu konsilon ĉe saĝulo, ne tro fieru por utiligi bonan konsilon.
Ĉiam benu la Sinjoron, vian Dion,
kaj petu de Li, ke viaj vojoj estu rektaj,
ke ĉiuj iroj kaj planoj viaj estu bon-sortaj.

LAŬDKANTO DE ZEĤARJA – BENEDICTUS (Luk 1,68-79)
Benata estu la Eternulo, *
la Dio de Izrael,
ĉar Li vizitis Sian popolon *
kaj faris por ili elaĉeton,
kaj levis kornon de savo por ni *
en la domo de Sia servanto David,
kiel Li parolis per la buŝo de Siaj sanktaj profetoj, *
de post la komenco de la mondo,
savadon el niaj malamikoj *
kaj el la mano de ĉiuj niaj malamantoj;
por montri Sian bonecon ĉe niaj patroj, *
kaj por memori Sian sanktan interligon;
la ĵuron, kiun Li ĵuris *
al nia patro Abraham;
ke Li donos al ni, † ke, liberigite el la mano de niaj malamikoj, *
ni servu Lin sentime,
en sankteco kaj justeco antaŭ Li *
ĉiujn niajn tagojn.

Kaj vi, infano, estos nomata *
profeto de la Plejaltulo,
ĉar vi iros antaŭ la vizaĝo de la Sinjoro, *
por pretigi Liajn vojojn,
por doni al Lia popolo scion de savo *
en la pardonado de iliaj pekoj,
pro la kompata koro de nia Dio, *
per kiu nin vizitis la sun-leviĝo de supre,
por lumi sur tiujn, kiuj sidas en mallumo † kaj en
la ombro de morto, *
por gvidi niajn piedojn en la vojon de paco.
Gloro al la Patro kaj al la Filo *
kaj al la Sankta Spirito,
kiel en la komenco, tiel nun kaj ĉiam *
kaj en eterno. Amen.

PETOJ PRI BONA TAGO
Bona Dio, asistu hodiaŭ al mi.
Sukcesigu, kion mi planis por hodiaŭ …
Faru min atentema kaj malferma por la homoj, kiujn mi hodiaŭ renkontos …
Igu min kreski en la amo al Vi.

FERMO DE LA MATENA PREĜO
Patro nia, kiu estas en la ĉielo,
sanktigata estu Via nomo.
Venu Via regno.
Fariĝu Via volo,
kiel en la ĉielo, tiel ankaŭ sur la tero.

Nian panon ĉiutagan donu al ni hodiaŭ.
Kaj pardonu al ni niajn ŝuldojn,
kiel ankaŭ ni pardonas al niaj ŝuldantoj.
Kaj ne konduku nin en tenton,
sed liberigu nin de la malbono.

Ĉar Via estas la regno
kaj la potenco
kaj la gloro
eterne.

Amen.

Mia Sinjoro kaj mia Dio, mi ekgenuas antaŭ Vi kaj adoras Vian plej superan Majeston.
Mi dankas Vin pro ĉiuj bonfaroj, precipe ke Vi gardis min dum ĉi tiu nokto.
Mi dediĉas al Vi mian animon kaj mian korpon kaj ĉion, kion mi posedas.
Mi oferas al Vi ĉiujn farojn de la venanta tago. Mi volas ilin fari por Via honoro kaj por la savo de mia animo.
Mi firme intencas kristane travivi ĉi tiun tagon, ne ofendi Vin, mian amoplenan Patron, kaj bone plenumi ĉiujn miajn devojn.
Kompatema Dio, donu al mi la gracon por fidele efektivigi ĉi tiun intencon.

Amen.

La Ok Feliĉ-Anoncoj

Feliĉaj estas la malriĉaj en spirito, ĉar ilia estas la regno de la ĉielo.
Feliĉaj estas la plorantaj, ĉar ili konsoliĝos.
Feliĉaj estas la humilaj, ĉar ili heredos la teron.
Feliĉaj estas tiuj, kiuj malsatas kaj soifas justecon, ĉar ili satiĝos.
Feliĉaj estas la kompatemaj, ĉar ili ricevos kompaton.
Feliĉaj estas la kore puraj, ĉar ili vidos Dion.
Feliĉaj estas la pacigantoj, ĉar filoj de Dio ili estos nomataj.
Feliĉaj estas tiuj, kiuj estas persekutitaj pro justeco, ĉar ilia estas la regno de la ĉielo.

Mat 5,3-10

Ĉiutaga Preĝo

Sinjoro, mi scias, ke Vi min liberigos de mia mizero kaj kulpo. Faru, ke mi pri tio neniam forgesu; por ke mi ne dronu en malespero, por ke mi ne sufokiĝu en fiera pieco, por ke mi ne preterpaŝu indiferente la mizeron de miaj proksimuloj, por ke mi ne detruu la ĝojon de la aliaj.

Malfermu, mi petas, miajn okulojn, orelojn kaj koron, por ke mi admiru Viajn miraklojn; por ke mi laŭdu Vian perfektecon nun kaj en la eterna vivo. Amen.

Al la Gard-Anĝelo

Anĝelo de Dio, kiu estas mia gardanto, al kiu la Dia boneco min konfidis, lumigu kaj gardu min dum la tuta vivo kaj precipe en la horo de mia morto. Amen.

La Kruco-Signo

En la nomo de la Patro
kaj de la Filo
kaj de la Sankta Spirito.
Amen.

La 20 misteroj de la Rozario

Ĝojaj misteroj

- La anonco de la Anĝelo al la Virgulino Maria

- Vizito de Maria al Elizabeto

- La naskiĝo de la Infano Jesuo en Betlehemo

- La Infano Jesuo prezentita ĉe la Templo (prezento)

- Jesuo retrovita en la Templo meze de la instruistoj (retrovo)

Lumaj misteroj

- La Bapto de Nia Sinjoro Jesuo Kristo ĉe Jordano

- La nupto en Kana

- Jesuo anoncas la Regnon de Dio kaj invitas al konvertiĝo (montprediko)

- La Transfiguriĝo de Nia Sinjoro Jesuo Kristo sur Monto Tabor

- La starigo de la Eŭkaristio (lasta vespermanĝo)

Doloraj misteroj

- La preĝado kaj la agonio de Jesuo en la Olivarba ĝardeno

- La kruela skurĝado de Jesuo ĉe la kolono

- Jesuo kronita per tre pikantaj dornoj (dornokrono)

- Dolorplena vojaĝo de Jesuo al Kalvario (krucoportado)

- Krucumo kaj morto de Jesuo sur la kruco

Gloraj misteroj

- Resurekto de Nia Sinjoro Jesuo Kristo el la morto

- Ĉieliro de Nia Sinjoro Jesuo Kristo

- Descendo de la Sankta Spirito sur la Apostolojn kaj Marian en
la Vespermanĝejo (sendo de la Sankta Spirito)

- Ĉielenpreno de la Virgulino Maria

- Kronado de la Beata Virgulino Maria Reĝino de la Ĉielo kaj de la Tero

Pri Paco:

Ho Dipatrino, patrino de Kristo. Fidele vi persistis sub la kruco de via filo. Rapidu kun via helpo al ni, liaj gefratoj. Elaŭdu nin kaj gvidu nin sur la vojo de justeco, amo kaj paco. Amen.

Patro nia

Patro nia, kiu estas en la ĉielo,
sanktigata estu via nomo.
Venu via Regno.
Fariĝu via volo,
kiel en la ĉielo tiel ankaŭ sur la tero.
Nian panon ĉiutagan donu al ni hodiaŭ
kaj pardonu al ni niajn ŝuldojn,
kiel ankaŭ ni pardonas al niaj ŝuldantoj.
Kaj ne konduku nin en tenton,
sed liberigu nin de la malbono.
Amen.

Saluton Maria

Saluton, Maria, gracoplena,

la Sinjoro estas kun vi.

Benata vi estas inter la virinoj

kaj benata estas la frukto de via sino, Jesuo.

Sankta Maria, Dipatrino,

preĝu por ni pekuloj

nun kaj en la horo de nia morto.

Amen.

Preĝo antaŭ la Kruco

Ho Dio granda kaj glora,
mia Sinjoro, Jesuo Kristo,
disblovu, mi petas, la mallumojn de mia spirito,
donu al mi profundan humilecon,
fidon puran,
esperon firman,
amon ardan,
faru ke mi konu Vin, ho mia Dio,
kaj ke mi faru ĉion laŭ via sankta Volo.